Wednesday, August 19, 2015

நிஜத்தின் பிரதிபலிப்பு !



புகைப்படம் என்பது வெறும் படம் அல்ல. அது ஒரு 'கலை'. புகைப்படம் நம் வாழ்க்கையோடு ஒன்றிணைந்தது.

‘ஆயிரம் வார்த்தைகளால் விவரிக்க முடியாத ஒரு செய்தியை ஒரு புகைப்படம் சொல்லும்’ என்ற வாசகமே புகைப்படத்தின் சிறப்பை சொல்லும்.

புகைப்‘படம்’ பிடிக்காதவர்களே இன்று கிடையாது. ஒரு காலத்தில் யாராவது படம் எடுக்க வருகிறார்கள் என்றால் மக்கள் ஓட்டம் பிடித்த காலம் உண்டு. போட்டோ பிடித்தால் ஆயள் குறைந்துவிடும் என்ற ‘நம்பிக்கையும்’ இருந்தது. அதே நேரத்தில் 3 புகைப்பட பிரதிகள் தருவதற்கு முன்பு தரும் ’புரூப் காப்பி’க்காக காத்திருந்த காலங்கள் உண்டு. அது ஸ்டூடியோக்காரர்களின் காலம். அப்படியே அங்கிருந்து போட்டோ கடை(ஸ்டூடியோ அல்ல)க்கு சென்று சட்டம் போட்டு வாங்குவார்கள். அவர்கள் 2, 3 நாட்கள் அலைய விடுவார்கள்.

வாங்கி வந்து வீட்டில் மாட்டிய பிறகு தான் நிம்மதி. குடிசையாக இருந்தாலும் வீட்டுக்கு 4 படம் சுவற்றில் தொங்கும், அரிய பொருளாக பார்க்கப்பட்ட கேமராக்கள், டிஜிட்டல் மயமான பிறகு பல ஸ்டூடியோக்களும் காணாமல் போய் விட்டன.

தகவல் தொழில்நுட்பத்தின் வளர்ச்சியால் புகைப்படம் எடுப்பது இன்றைய சூழலில் எளிதாகி விட்டது. புகைப்படத்தின், தரம், வேகம், துாரம் என அனைத்து விதங்களிலும் முன்னேற்றமடைந்து விட்டது. செல்போன் வந்த பிறகு நின்றால், உட்கார்ந்தால், நடந்தால் மகிழ்ச்சியில், துயரத்தில் என எல்லா நிகழ்வுகளிலும் தினசரி படங்கள் எடுப்பது அதிகரித்துவிட்டது. குழந்தைகள் கூட புகைப்படம் எடுத்து மகிழ்கின்றன.

இன்று புகைப்படங்கள் வெறும் நினைவு சின்னம் மட்டுமல்ல உலகின் வரலாற்றை திருப்பிப் போட்டிருக்கிறது. இன படுகொலைகளை, அடிமைகள் படும் அல்லல்கள், அரசியல் அத்துமீறல்கள், சாதி வெறியாட்டங்கள், அதிகார அட்டகாசங்கள், இயற்கை சீரழிவுகள் என எல்லாவற்றையும் புகைப்படங்கள் அம்பலப்படுத்தியுள்ளன.

எந்த ஒரு அறிவியல் வளர்ச்சியிலுமே நன்மையும், தீமையும் சேர்ந்தே இருக்கும். கேமராவால் இன்று பல்வேறு பிரச்னைகள் உருவாகின்றன. Selfie என்ற பெயரில் சில உயிரிழப்புகளும் நிகழ்ந்துள்ளன. எனவே கேமராவை நன்மைக்கு மட்டுமே பயன்படுத்த வேண்டும்.

2 comments:

கரூர்பூபகீதன் said...

வணக்கம் தங்கள் தளத்திற்கு புதியவன் அழகான பதிவு வாழ்த்துகளும் நன்றிகளும்

அன்புடன் கரூர்புபகீதன் நன்றி!!!

உளறுவாயன் said...

தங்கள் ஆதரவுக்கு நன்றி நண்பரே...