Thursday, November 24, 2011

கூடங்குளம் அணு உலையால் ஆபத்து என்பது மக்களை ஏமாற்றும் வெளிநாட்டுச் சதியே!

 
இந்தியக் கலாச்சார நட்புறவுக் கழகம் தீர்மானம்

கூடங்குளம்
அணு மின் நிலையம் முழுக்க முழுக்க நாட்டின் நலன் கருதி அமைக்கப்பட்ட ஓன்று. .இதனால் மக்களின் உயிருக்கு ஆபத்து ஏற்படும் என்கிற வதந்தி மக்களிடையே பதற்றத்தை உருவாக்கி உள்ளது.ஆனால் இது தேவையற்ற அச்சமே. இதற்கு உதாரணமாக ஜப்பானின்  புகுஷிமா அணு உலை விபத்தை சுட்டிக் காட்டுவது தவறாகும். புகுஷிமாவில் கதிர் இயக்க பாதிப்பால் மரணம் ஏற்படவில்லை என்பதை மறைத்து இந்த பொய்ப்பிரச்சாரம் பரப்பப்படுகிறது என்பதை மக்கள் உணரவேண்டும். இந்திய-ரஷிய நட்புறவை முடக்க நினைக்கும் வெளி நாட்டு சக்திகளின் சதிவேலைக்கு சிலர் விலை போயிருக்கின்றனர். அவர்கள்தான் மக்களிடையே அச்ச உணர்வை தீமூட்டி வளர்த்து வருகின்றனர். அணு மின்சக்திக்கு ஆதரவாக பேசும் மிகப் பெரிய அறிவியலாளர்களும், சுற்றுச் சூழல் ஆர்வலர்களும், அறிவுஜீவிகளும், இந்த நாட்டுக்கு எதிரான நிலையை  ஒருபோதும் மேற்கொள்ள மாட்டார்கள் என்பதை மக்கள் உணரவேண்டும். 

அறியாமையாலும் அச்சத்தாலும் திரளும் மக்கள் கூட்டத்தை அரசியல் லாபத்துக்காக ஏமாற்ற நினைக்கும் சில அரசியல்  கட்சிகளும் கூடங்குளம் அணு மின் நிலையத்திற்கு எதிராக விஷமப் பிரச்சாரம் மேற்கொண்டு வருகின்றனர். இது தேசவிரோதச் செயல் என்பதை அவர்கள் உணராதது வருத்தமளிக்கும் செயலாகும்.நாட்டைப் பிளவு படுத்த நினைக்கும் சக்திகளுடன் அறிந்தும் அறியாமலும் இத்தகைய அரசியல் சக்திகள் துணை போவது நாட்டின் எதிர்கால நலனுக்கு ஆபத்தானது என்பதை அவர்கள் உணரட்டும்.

மத்திய மாநில அரசுகளும் மக்களின் அச்சத்தை போக்கும் நடவடிக்கையில் இறங்கி தீவிரமாகச் செயல்பட்டு கூடங்குளம் அணு மின் நிலையம் விரைவில் இயங்க ஏற்பாடுகளைச் செய்யவேண்டும்.

இந்தியக் கலாச்சார நட்புறவுக்கழகம் [இஸ்கப்]  கூடங்குளம் அணு மின் நிலையத்திற்கு ஆதரவாக மாநிலமெங்கும் விழிப்புணர்வுப் பிரச்சாரம் மேற்கொள்வதென முடிவு செய்துள்ளது. கருத்தரங்கங்கள், மனிதச் சங்கிலிகள், அறிக்கை வெளியீடுகள்  ஆகிய நடவடிக்கைகள் மூலம் மக்களின் அச்சத்தை போக்கவும் ,பொய்ப் பிரச்சாரம் செய்யும் விஷமிகளின் சதியை முறியடிக்கவும் இஸ்கப் அமைப்பு திட்டமிட்டு வருகிறது.  

1 comment:

Anonymous said...

கூடங்குளம் அணு மின் நிலையத்திற்கு ஆதரவாக செயல் படுவோர் வீண் போராட்டங்களைத் தவிர்த்து பொது மக்களுக்கு அதனை சரியான முறையில் புரிய வைக்கும் முயற்சிகளில் இறங்கவேண்டும்.